1022
Буряад драмын театрай «Старик и море» гэһэн зүжэг Нижневартовск хотодо үнгэргэгдэһэн «Северные встречи» гэһэн театрай уласхоорондын V-дахи фестивальда «Синтез малых форм и общечеловеческой культуры» гэһэн номинацида Лауреадай нэрэ зэргэдэ хүртэбэ.
Ородой Холбоото Уласай можо нютагуудай болон хари гүрэнэй түлөөлэгшэдэй хабаадалгатай фестиваль дүрбэн үдэрэй туршада Нижневартовск хотын драмын театрта үнгэрөө. Энэ хэмжээ ябуулгада Э. Хемингуэйн зохёолоор Х. Намсараевай нэрэмжэтэ Буряад драмын театрта найруулагдан табигдаһан «Старик и море» гэһэн зүжэг Нижневартовск хотын ажаһуугшадай болон айлшадай зүрхэ сэдьхэл доһолгоо. Гол роль гүйсэдхэһэн Буряадай арадай зүжэгшэн Баста Цыденов болон найруулагша, зүжэгшэн Виктор Жалсанов хоёрой хабаадалгатай харуулһан моноспектакль олон харагшадые хүлгөөжэ, сэдьхэлэйнь хүбшэргэйнүүдые дайража, амжалта туйлаа.
